Morgunandakt - 5 vikna aðhald til að auka orku og bæta líðan (6. apríl - 10. maí)

Við hittumst alla morgna nema sunnudagsmorgna, kl 7:10 og gerum öndunaræfingu saman og ræðum aðeins um heilsubætandi atriði úr verkfærakistu ayurvedafræðanna. Hver hittingur er 30 mín langur og hefst alltaf á víxlöndun sem kallast Nadi Shodana. Þetta er stórkostlega áhrifarík öndun sem eykur lífskraftinn og fínpússar orkuflæðið eftir orkubrautum líkamans.

Fjöldinn allur af rannsóknum hefur sýnt fram á jákvæð áhrif eins og t.d.:

• Minnkar streitu
• Styrkir taugakerfið
• Bætir sefn
• Lækkar blóðþrýsting
• Eykur lungnarýmd og virkni lungnanna
• Styrkir minnið
• Bætir fyrirtíðaspennu
• Minnkar víða
• Róar tilfinningarnar
• Minnkar neikvæð einkenni breytingaskeiðs eins og hitakóf og svefntruflanir

Hér eru tenglar í nokkrar rannsóknir á virkni nadi shodana. 

https://pmc.ncbi.nlm.nih.gov/articles/PMC11996816/

https://pmc.ncbi.nlm.nih.gov/articles/PMC10388195/

Á fimm vikum muntu finna mikinn mun á orku og andlegri líðan. Heilunarmáttur líkamans er virkjaður með þessari öndunartækni.  Stundum munum við bæta stuttri annarskonar öndunaræfingu aftan við eða stuttri leiddri hugleiðslu en alltaf verður stutt ayurvedaspjall í lokin. 

Fyrir hittinginn verður þú búinn að fara í sturtu og vekja líkamann aðeins með  teygjum og eftir hittinginn er tilvalið að borða léttan morgunverð og halda svo af stað út í daginn.  Við ræðum um heppilega morgunrútínu í fræðslunni fyrstu dagana. 

Námskeiðið hefst 6 apríl kl 7:10 og lýkur 9. maí þegar við gerum síðustu öndunaræfinguna en þá verðum við komin í 25 mín ástundun. Við hefjum þó leika á 5 mín öndun og megnið af tímanum verður fræðsla og spjall. Smá hugleiðsla í bland við fræðslu. En smám saman lengist öndunaræfingin þar til við verðum komin í 25 mín af víxlöndun. Það þarf að anda víxlöndunina í a.m.k. 20 mín til að virkilega verða var við breytingar á líkama og huga. Við vinnum okkur upp í það smá saman. Þegar námskeiðinu lýkur getur þú haldið áfram á eigin spítur þessari heilsubætandi iðju. 

Þetta er stórkostlega öflug leið til að byrja daginn. Þú ferð með gleði í hjarta og kyrrð í taugakerfinu inn í daginn. Góð morgunrútína er kölluð DINACHARYA  í ayurveda lífsvísindunum og er lögð mikil áhersla á að hver og einn komi sér upp góðri dinacharya til að viðhalda góðri heilsu eða bæta heilsu ef hún er ekki nógu góð. 

Það hefst annað námskeið í byrjun júní ef þú vilt áframhaldandi aðhald við ástundunina.